სტუდენტური გაერთიანება "ლაბორატორია 1918"-ს წევრები თსუ-ს რექტორის ალექსანდრე კვიტაშვილის კაბინეტთან სკანდირებენ - "გეშინოდეთ ჩვენი".სტუდენტების აქცია თსუ-ში დილიდან მიმდინარეობს. ისინი პოლიტიკური ნიშნით უნივერსიტეტიდან პროფესორ-მასწავლებლების გათავისუფლებას აპროტესტებენ. აქცია ჯერ თსუ-ს პირველ კორპუსთან მიმდინარეობდა, შემდეგ კი სტუდენტებმა უნივერსიტეტის სააქტო დარბაზში გადაინაცვლეს. ასევე, მოგვიანებით, მათ თსუ-ს რექტორის კაბინეტის მისაღებში გადაინაცვლეს და ალექსანდრე კვიტაშვილთან შეხვედრა მოითხოვეს.
მათთან რექტორი გამოვიდა, რა დროსაც ალექსანდრე კვიტაშვილსა და სტუდენტებს შორის სიტყვიერი შელაპარაკება მოხდა.
სტუდენტური გაერთიანება "ლაბორატორია 1918"-ის წევრებმა, რომლებიც თსუ-ში მიმდინარე სტუდენტების აქციაში მონაწილეობენ, რექტორთან შეხვედრა მოითხოვეს და მის კაბინეტთან სკანდირებდნენ - "გამოდი, გამოდი". ამის შემდეგ ალექსანდრე კვიტაშვილი მათთან გამოვიდა და განაცხადა, რომ ერთი წელია, "ლაბორატორია 1918"-ის წევრებთან შეხვედრას უშედეგოდ ითხოვს. რექტორის განცხადებამ სტუდენტების მძაფრი რეაქცია გამოიწვია. მათი თქმით, ორი წელია თავად ისინი ითხოვენ რექტორთან შეხვედრას, თუმცა ეს ვერ ხერხდება, კვიტაშვილის განცხადება შეხვედრის სურვილთან დაკავშირებით კი ტყუილია.
სტუდენტებმა რექტორს ისიც განუცხადეს, რომ უნივერსიტეტში ავტოკრატიაა და მაღალი გადასახადების შესაბამისი სწავლების დონე არ არის, რექტორი, რექტორატი და რექტორატთან დაახლოებული პირები მხოლოდ მაღალ ხელფასებს იღებენ, საქმე კი არ კეთდება.
სტუდენტებმა რექტორს სააქტო დარბაზში გადასვლისკენ მოუწოდეს, თუმცა რექტორმა განაცხადა, რომ ასეთ რეჟიმში აღელვებულ სტუდენტებთან შეხვედრა წარმოუდგენელია.
იხილეთ ვიდეო
"ინტერპრესნიუსი"
