ოქსფორდის უნივერსიტეტის კურსდამთავრებულთა მეათედი სპეციალობით სამსახურის შოვნას ვერ ახერხებს. ამაზე თავად უნივერსიტეტის ჩატარებული კვლევის შედეგები მეტყველებს, რომელსაც გაზეთი "ტელეგრაფი" ავრცელებს. საკუთარ კურსდამთავრებულთა დასაქმების შესახებ მსგავსი მონაცემები სასწავლებელმა პირველად გამოაქვეყნა.

როგორ აღმოჩნდა, 3500 ადამიანიდან, რომლებიც გამოკითხვაში მონაწილეობდნენ, 200-მა დიპლომის მიღების შემდეგ, ნახევარი წლის განმავლობაში, საკუთარი სპეციალობით დასაქმება ვერ შეძლო.

ოქსფორდის ყოფილ სტუდენტებს რეგისტრატორების, კონსულტანტებისა და მიმტანების ვაკანსიებს სთავაზობენ. უნივერსიტეტის კურსდამთავრებულებს შორის უმუშევრობის დონე 6%-ს შეადგენს, თუმცა ეს მაჩვენებელი ფაკულტეტების მიხედვით მერყეობს.

ყველაზე მეტად დაზარალდნენ ის კურსდამთავრებულები, რომლებიც "არაგამოყენებით" მეცნიერებას ეუფლებოდნენ - კლასიკურ არქეოლოგიას, უძველეს ისტორიასა და უცხო ენებს.

იზაბელ მიურეი, რომელიც ოქსფორდში პოლიტიკას, ეკონომიკასა და ფილოსოფიას სწავლობდა, სწავლის დასრულების შემდეგ სტაჟირებაზე ინდოეთში გაემგზავრა. ერთადერთი ადგილი, რომელიც დიდი ბრიტანეთის სასწავლებლის კურსდამთავრებულს ინდოეთში შესთავაზეს, რესტორანში მიმტანის ვაკანსია იყო. მიურეი ანალოგიურ პრობლემებს წააწყდა სამშობლოშიც.

ჰოლი გრემი ოქსფორდში ინგლისურ ენას სწავლობდა და ბოლო გამოცდაში მაღალი ქულები მიიღო. ამჟამად, ის კულინარიულ არხზე რეკლამას ანთავსებს და საკვების შესახებ ბლოგს უძღვება.

ოქსფორდის კარიერული სამსახურის დირექტორ, ჯონათან ბლექს მიაჩნია, რომ ეს დროებითი სირთულეებია. "ოქსფორდში მიღებული განათლება ადამიანს მთელი ცხოვრება გაჰყვება", - განაცხადა ბლექმა.

მომზადებულია Telegraph-ის მიხედვით.