ახმედ ჩატაევი ლოპოტას ხეობაში მყოფ ე.წ. ბოევიკებთან მოსალაპარაკებლად საქართველოს შინაგან საქმეთა სამინისტრომ შეუშვა, თუმცა საბოლოოდ მან ქართველი სამართალდამცავები მოატყუა, - ამის შესახებ რუსული გამოცემა "კომერსანტი" წერს.გაზეთის ინფორმაციით, ჩატაევი გამოცდილი მებრძოლი, იყო. მან ჩეჩნეთის ომში მარჯვენა ხელი დაკარგა და ის თბილისში ლეგალურად ცხოვრობდა.
როგორც გამოცემა წერს, ქართულმა მხარემ სისხლისღვრის თავიდან ასაცილებლად გადაწყვიტა, მომლაპარაკებლად ისეთი ავტორიტეტული ფიგურა გამოეყენებინა, როგორიც ჩატაევი იყო.
"ახმედ ჩატაევმა ქართველი სამართალდამცავები მოატყუა. მან არ დაიწყო ბოევიკებთან მოლაპარაკება, რომ ისინი ქართულ პოლიციას ჩაბარებოდნენ და პირიქით, მოუწოდა მათ ბრძოლაში ჩაბმულიყვნენ. ყოველ შემთხვევაში ასეთ კვალიფიკაციას აძლევს ქართული მხარე ჩატაევის ქმედებას. მათი ინფორმაციით, ჩატაევს უკვე შეეფარდა ორთვიანი წინასწარი პატიმრობა", - წერს გამოცემა.
"კომერსანტის" ცნობით, ახმედ ჩატაევს იცნობდნენ, როგორც "ახმედ ცალხელას". ის რუსეთის სამართალდამცევის მიერ 2003 წლიდან იძებნებოდა. ამ წლების განმავლობაში ჩატაევი არაერთ ქვეყანაში დაიჭირეს სხვადასხვა დანაშაულის ჩადენის გამო, თუმა ყველა შემთხვევაში რუსეთში ექსტრადაციას გადაურჩა.
გამოცემის ინფორმაციით, როგორც საქართველოს შინაგან საქმეთა სამინისტროში აცხადებენ, რუსეთს ჩატაევის ექსტრადაციის მოთხოვნით ქართული მხარისთვის არ მიუმართავს, თუმცა სურილის შემთხვევაში მოსკოვს ამის გაკეთება შვეიცარიის საელჩოს გავლით მოუწევს, რადგან ქვეყანას შორის არ არსებობს დიპლომატიური კავშირი.
"ინტერპრესნიუსი"
