ყველა იმ პროცესზე, რაც დღეს აფხაზეთში მიმდინარეობს, რუსეთია პასუხისმგებელი, - ამის შესახებ პარლამენტის თავმჯდომარე დავით ბაქრაძემ აფხაზეთის დე-ფაქტო პრეზიდენტზე ალექსანდრე ანქვაბზე განხორციელებული ტერაქტის კომენტირებისას განაცხადა.

მისივე თქმით, საერთაშორისო სამართლის მიხედვით, სწორედ რუსეთია პასუხისმგებელი იმაზე, რაც ოკუპირებულ რეგიონებში ხდება.

"მე ვერ გეტყვით კონკრეტულად რას უკავშირდება ეს ტერაქტი, არის ეს კლანებს შორის ძალაუფლების გადანაწილება თუ ოკუპანტი ძალის მხრიდან საკუთარი უკმაყოფილების გამოხატვა, მაგრამ ნებისმიერ შემთხვევაში, ყველა პროცესზე, რომელიც დღეს აფხაზეთში მიმდინარეობს, პასუხისმგებლობა ეკისრება რუსეთს, როგორც ოკუპანტ სახელმწიფოს", - განაცხადა დავით ბაქრაძემ.

აფხაზეთის დე-ფაქტო პრეზიდენტის ალექსანდრე ანქვაბის ავტომობილს და მის კორტეჟს დღეს გუდაუთა-სოხუმის გზაზე 08:30 საათზე დაესხნენ თავს. თავდაპირველად გზაზე დადებული ფუგასი აფეთქდა, შემდეგ კი ანქვაბის ავტომობილს ახლომდებარე მთიდან ყუმბარმტყორცნიდან და ავტომატიდან გაუხსნეს ცეცხლი. დაცვის სამსახურმა საპასუხო ცეცხლი გახსნა. თავად ანქვაბი არ დაშავებულა, თუმცა, დაიჭრა მისი პირადი დაცვის სამი წევრი, რომელთაგან ერთი გარდაიცვალა.
ეს ალექსანდრე ანქვაბზე თავდასხმის უკვე მეექვსე შემთხვევაა და დღემდე არც ერთი მათგანი არ არის გახსნილი. თავდასხმები 2005 წლიდან გრძელდება. ანქვაბი ორჯერ იყო მსუბუქად დაჭრილი.

"ინტერპრესნიუსი"