აგრესიასთან პირისპირ ერთადერთი გამოსავალი დამრჩა - გამარჯვება ან სიკვდილი, -ასეთი განცხადება გააკეთა ლიბიის ხელისუფლების ლიდერმა, მუამარ კადაფიმ ერთ-ერთი რადიოსადგურით გამოსვლის დროს.

უცხოური საინფორმაციო საააგენტოების ცნობით, კადაფიმ რადიომიმართვა მას შემდეგ გააკეთა, რაც ამბოხებულებმა ტრიპოლიში კადაფის რეზიდენცია შტურმით აიღეს.

მისივე თქმით, რეზიდენციისთვის ბრძოლის დროს უკან დახევა ტაქტიკური მანევრი იყო.

ამასთან, როგორც ლიბიის ხელისუფლების ლიდერმა აღნიშნა, რეზიდენციის ბუნკერი ნატო-ს ავიადარტყმების დროს სრულად განადგურდა.

კადაფის შემდეგ, რადიოეთერით გამოვიდა მისი პრესსპიკერი მუსა იბრაგიმი, რომლის თქმითაც, "კადაფის რეჟიმი წინააღმდეგობას გააგრძელებს, თუნდაც ეს თვეები და წლები გაგრძელდეს, ლიბია კი ვულკანად, ლავად და ცეცხლად იქცევა".

ლიბიელმა ამბოხებულებმა ტრიპოლიში, კერძოდ ბაბ-ალ აზიზიას რაიონში მდებარე მუამარ კადაფის რეზიდენცია შტურმით აიღეს. "როიტერის" ინფორმაციით, ამის შესახებ ლიბიაში გაერო-ს წარმომადგენელმა წუხელ განაცხადა.
მისი თქმით, "პრეზიდენტის რეზიდენცია რევოლუციონერების ხელშია. ლიბიის ტერიტორიაზე წესრიგი 72 საათში სრულად აღდგება".

ამასთან, არსებული ინფორმაციით, 23 აგვისტროს რეზიდენციისთვის ბრძოლის დროს 400 ადამიანი დაიღუპა.

"ინტერპრესნიუსი"