"პალიტრა L" - მა "ლიბერთინსის" აქციის ფარგლებში, თინეიჯერებს კირა კასის "შერჩევა" შესთავაზა

"ბიბლუსი გალერეაში" "ლიბერთინსის" მორიგი აქცია გაიმართა. აქციის ფარგლებში გამომცემლობა "პალიტრა L" - მა თინეიჯერებს ამჯერად კირა კასის "შერჩევა" შესთავაზა. "ლიბერთინსმა" წიგნის პრეზენტაციას, ტრადიციულად აქცია მიუძღვნა, რომელიც თავისი მასშტაბით განსაკუთრებულია. თინეიჯერ მკითხველს კი New York Times-ის ბესტსელერი შესთავაზა.

"დღევანდელი დღე განსაკუთრებულია, რადგან აქცია ერთდროულად საქართველოს 5 ქალაქში: თბილისში, ბათუმში, ქუთაისში, ჭიათურასა და ზუგდიდში მიმდინარეობს. რაც შეეხება წიგნს, "შერჩევა" New York Times-ის ბესთსელერია, გაყიდულია, დაახლოებით 5 მილიონზე მეტი ეგზემპლარი და ნათარგმნია 30 ენაზე. გვინდოდა, ჩვენი თინეიჯერებისთვისაც გაგვეკეთებინა ეს საჩუქარი", - განაცხადა "პალიტრა L"-ის მარკეტინგის მენეჯერმა ხვიჩა ჯღუტაშვილმა.

"ლიბერთინსის" წევრი ლევან ჭყონია თინეიჯერებს მის წაკითხვას ურჩევს: "დინამიურია, სწრაფად ვითარდება მოვლენები. ისეთი ენით წერია, ვერ მოწყდები".

თინეიჯერები, რომლებმაც კირა კასის "შერჩევა" აქციის ფარგლებში შეიძინეს, ამბობენ: "ხშირად დავდივარ წიგნის მაღაზიებში, ძალიან მიყვარს კითხვა, მომწონს ეს აქცია, მკითხველებისთვის კარგი აქციაა" - აღნიშნა ნინო კიკვაძემ.

"კითხვა ძალიან მიყვარს. მეგობრებთან ერთად მოვედი, ამ წიგნის მოკლე შინაარსი "ფეისბუქზე" წავიკითხე და მომეწონა. ამიტომ წიგნის შეძენა გადავწყვიტე", - აღნიშნა სოფო კინწურაშვილმა.

"ლიბერთინსის" აქციის ფარგლებში გამოსული შემდეგი წიგნი "მეხუთე ტალღა" იქნება. მისივე თქმით, ამ წიგნის ეკრანიაზაცია ახლახანს იყო საქართველოს კონოთეატრებში და მკითხველიც მალე შეძლებს ეს წიგნი წაიკითხოს.