რუსული lifesports-ის ინფორმაციით, 17 წლის ქართველი ფეხბურთელის,  ჯანო ანანიძის შესაძენად, ყველაზე მეტად იტალიური "მილანი" აქტიურობს. "როსონერის" სკაუტები რამდენიმეჯერ დაესწრნენ ანანიძის თამაშებს და დაკვირვებას მომავალშიც აპირებენ.  

თუმცა, აქვეა მოყვანილი ჯანოს მამის, ამირან ანანიძის სიტყვები, რომელიც ამ ტრანსფერის წინააღმდეგია: "ჩემი შვილი ჯერ ძალიან ახალგაზრდაა. ჯანოს "სპარტაკში" კარგად ეპყრობიან და აქ თამაში სიამოვნებს. რატომ უნდა წახვიდე სხვაგან, როცა გუნდში ასე კარგად გექცევიან და გენდობიან? ამიტომაც, მისი სხვაგან გადასვლის წინააღმდეგი ვარ".

თუმცა, რუსული გამოცემა ირწმუნება, რომ "მილანს" ანანიძის შეძენის კარგი შანსი აქვს და ეს შანსი უფრო გაიზრდება, თუკი, კახა კალაძე "როსონერიში" დარჩება და ახალგაზრდა თანამემამულეს ადაპტაციაში დაეხმარება. ისე, კალაძის ფაქტორი, ალბათ, ნაკლებად დამაიმედებელია, რადგან საქართველოს ეროვნული ნაკრების კაპიტანს, ზაფხულში "მილანიდან" აბარგება გადაწყვეტილი აქვს.

lifesports-ის ცნობით, "მილანი" კიევის "დინამოს" გენერალურ  დირექტორ რეზო ჭოხონელიძესაც (რომელიც იტალიურ კლუბში წლების განმავლობაში მუშაობდა სკაუტად) დაუკავშირდა და მისგან კარგი რეკომენდაციები მიიღო ჯანოზე.

"ანანიძე? "მილანი" ნამდვილად არ ინანებს მის შეძენას", - ამბობს ჭოხონელიძე.  
"როსონერის" ჯანოსადმი ინტერესზე ადრეც იყო ცნობილი. ამას გარდა, უნიჭიერეს ქართველ შემტევს სხვა იტალიური კლუბები - "იუვენტუსი" და "ფიორენტინა", ასევე ესპანური "სევილია" და ინგლისურები - "არსენალი" და "ლივერპული" აკვირდებიან.


ილია ნანობაშვილი
"მსოფლიო სპორტი"