კატალონიური “ბარსელონას” ჟუვენილ ბ-ის უნიჭიერესმა ქართველმა ფორვარდმა გიორგი ჭანტურიამ მორიგი გოლებით გაიმდიდრა აქტივი. ჟუვენილ ბ-ის ჩემპიონატის კატალონიის ზონის 24-ე ტურში “ბარსას” ყმაწვილებმა “კორნელიას” 4:1 მოუგეს და კვლავაც ლიდერები არიან.

ბარსელონელები თავიდან აგებდნენ, მაგრამ 16 წლის ქართველმა ჯერ ანგარიში გაათანაბრა, შემდეგ კი წინ გაიყვანა თავისიანები. გიორგიმ პირველი გოლი ხერარდ დელუფოს პასით (მან 3 საგოლე პასი გააკეთა) შეაგდო, მეორე კი ინდივიდუალური გარღვევით მიითვალა. ჭანტურია მატჩის ბოლო წუთებზე შეცვალეს.

გიორგის ჟუვენილ ბ-ს კატალონიის ზონის ჩემპიონატში 9 გოლი აქვს გატანილი. აღსანიშნავია, რომ “კორნელიასთან” არ უთამაშია კამერუნელ ბომბარდირ გაელ ეტოკს, რის გამოც ქართველი მარჯვენა გარემარბის პოზიციიდან ცენტრფორვარდად გადასწიეს.

”მსოფლიო სპორტი”