ფეხბურთელი გუგა გუგავა ესპანეთში, კლუბ "არენასში", 8 ნომრით თამაშობს. რამდენიმე წლის წინაც, როდესაც "დინამოს" წევრი იყო, 8-ნომრიანი მაისური ეცვა, ამიტომაც არის მისი მანქანის ნომერი "გოლ-008".

- გუგა, რა მანქანა გყავს?
- "მერსედესი clk". ორი წელიწადია, შევიძინე. უფრო სწორად, ოჯახის წევრებმა მაჩუქეს, როდესაც მიხვდნენ, რომ მანქანას კარგად ვმართავდი.

- მართვა ვინ გასწავლა?
- თავდაპირველად მამაჩემი მასწავლიდა, მერე - ძმა. და, სხვათა შორის, გამოცდა ძალიან იოლად ჩავაბარე.

- ფრთხილი მძღოლი ხარ?
- ძალიან ფრთხილი, თუმცა სისწრაფე ისე მიყვარს, რომ ქალაქშიც ძალიან სწრაფად ვმოძრაობ.

- სისწრაფე თუ გიყვარს, ალბათ, ავტორბოლებსაც ადევნებ თვალყურს.
- არა, ამისათვის ვერ ვიცლი. ისე, თუ შემომთავაზეს, სიამოვნებით მივიღებ მონაწილეობას. ექსტრემული სიტუაციები ძალიან მხიბლავს.

- ალბათ, პატრული ხშირად გაჩერებთ...
- ასეა, თუმცა ბოლო დროს მწყალობენ, რამდენი ხანია, ჯარიმაც კი არ გამოუწერია არავის.

- "სითი პარკის" ბარათებზე რას იტყვი, კმაყოფილი ხარ ამ პროექტით?
- საქართველოში ახლახან დავბრუნდი, არც კი ვიცოდი, ასეთი რამ თუ არსებობდა და ვერ ვხვდებოდი, რატომ არ მაჩერებინებდნენ ავტომობილს სადგომზე...

- ავტომობილს მეგობარს თუ ათხოვებ?
- მირჩევნია, არ ვათხოვო, თუმცა ზოგჯერ უარის თქმაც მიჭირს... მაგრამ ვიდრე მომიყვანენ, ვნერვიულობ.

- ავტოსაგზაო შემთხვევა გქონია?
- (იცინის) გამოუცდელი მძღოლივით მომდის ხოლმე. ერთხელ რუსთაველზე მოვდიოდი, გვერდით მეგობარმა დამისიგნალა, გავხედე და იმწამსვე მივაჯექი ცხვირით ჩემ წინ მოძრავ ავტომობილს, რომელშიც ორსული ქალი იჯდა. ღვთის წყალობით, მხოლოდ ჩემი ავტომობილი დაზიანდა.

- რომელია შენი საოცნებო მანქანა?
- ჩემი კი არა, ალბათ, ყველას ოცნებაა "მერსედეს სლრ", რომელიც ნახევარი მილიონი ღირს. ჯიპი მაინცდამაინც არ მხიბლავს... სპორტული ავტომობილი ყველაზე უკეთესია.

სოფო ყარალაშვილი

”ყველა სიახლე”