მეზობლები მას “ზონას” სახელით იცნობენ, თუმცა, არსებული ინფორმაციით, პასპორტის მიხედვით მისი სახელი და გვარია რუსლან პაპასკირი.

მისი დაკითხვა ვაჟა-ფშაველას 47 ნომერში ამ წუთებში მიმდინარეობს.  მეზობლების გადმოცემით, ნაღმის აფეთქების დროს მას ნამსხვრევი მოხვდა და ფეხშია დაჭრილი.  ახალგაზრდა რესპუბლიკური საავადმყოფოდან წუხელვე გაწერეს და სახლში მკურნალობს.

როგორც ერთ-ერთმა თვითმხილველმა, ნონა ჭეიშვილმა “ინტერპრესნიუსს” განუცხადა, საკუთარი თვალით დაინახა, რომ აფეთქება ჩეჩენი ეროვნების მამაკაცის სადარბაზოში შესვლიდან რამდენიმე წამში მოხდა.

“წუხელ, დაახლოებით, 24:00 საათზე, მეგობრებს ველოდებოდი და სადარბაზოში, მეოთხე სართულზე ფანჯარასთან ვიდექი. დავინახე “მერსედესის” მარკის ავტომანქანა როგორ გაჩერდა, სადაც ორი მამაკაცი იმყოფებოდა, საჭესთან  კი, ჩეჩენი იჯდა. გადმოვიდნენ, შევიდნენ სადარბაზოში და აფეთქება რამდენიმე წამში მომენტალურად მოხდა. ირგვლივ არავინ იმყოფებოდა, აფეთქება ალბათ  უთვალთვალებდნენ და დისტანციური პულტის გამოყენებით მოხდა. შემდეგ გავიგე, თითქოს მისი ლიკვიდაცია უნდოდათ. მე არ ვიცნობ ამ ოჯახს. ერთი თვეა, ამ მისამართზე გადმოვედით”, - განაცხადა ნონა ჭეიშვილმა და აღნიშნა, რომ ჩეჩენს ნაღმის ნამსხვრევი მოხვდა, საავადმყოფოში კი, იმ მამაკაცმა წაიყვანა, რომელიც  ახლდა.

კიდევ ერთი მეზობლის ინფორმაციით, ჩეჩენი ეროვნების ოჯახს ბინა ნაქირავები აქვს და 5 წელია, აქ ცხოვრობენ. ისინი ბინის შესყიდვასაც გეგმავდნენ. “ზონას” ძმა მეზობელ კორპუსში ცხოვრობს.

მეზობლები ოჯახს დადებითად ახასიათებენ. მათი ინფორმაციით, ცოლ-ქმარს კარგი ურთიერთობა აქვთ და წყნარი ოჯახია. რაც შეეხება მათ საქმიანობას, მეზობლების ინფორმაციით, დაჭრილი ახალგაზრდა ავტომანქანებს ხშირად იცვლის, ავტომანქანებით ვაჭრობს. მისი მეუღლე კი, ოქროს სამკაულების ბიზნესით არის დაკავებული და ჩეჩენი ეროვნების ქალებს თავისი ოქროს ბირჟა აქვთ.

ამასთან, ამ წუთებში კორპუსთან განაღმვითი სამუშაოები მიმდინარეობს. გამნაღმველები შემთხვევის ადგილთან მიახლოების უფლებას არავის აძლევენ და განმარტავენ, რომ ეს სახიფათოა.

"ინტერპრესნიუსი"