უგანდაში ძლიერმა წვიმებმა დიდი წყალდიდობა გამოიწვია, რომლის შედეგადაც 30-ზე მეტი დასახლებული პუნქტი დაიტბორა, მაშველებმა უკვე განახორციელეს 20 ათასი ადამიანის ევაკუაცია. ამის შესახებ ტელეარხი "Аль-Джазира" იტყობინება.
ადგილობრივი მთავრობის ინფორმაციით, უგანდაში ბოლო შვიდი დღეა წვიმს. მრავალმა მოსახლემ თავად დატოვა საცხოვრებელი სახლი და მაშველების მოლოდინში მაღლობებში გადაინაცვლა. დახრილ ფერდობებზე გაშენებული სოფლების მოსახლეობისთვის ამჟამად განსაკუთრებულ საფრთხეს მეწყერი წარმოადგენს.
2 მარტს ძლიერი წვიმების შედეგად მოვარდნილმა მეწყერმა ბუდუდას რაიონში მთელი სოფელი დაფარა. ბოლო მონაცემებით, მაშველებმა დაღუპულთა 100-ზე მეტი გვამი აღმოაჩინეს, 300 ადამიანი კი უგზოუკვლოდ დაკარგულად ითვლება.
მომზადებულია lenta.ru-ს მიხედვით.
18:02 / 05-03-2010
წყალდიდობამ უგანდაში 20 ათასი ადამიანი უსახლკაროდ დატოვა
