მისი თქმით, პირველი პრეზიდენტის ვაჟი კრიმინალური მენტალიტეტის მქონე, წამალზე დამოკიდებული და რუსეთის სპეცსამსახურების დავალების შემსრულებელია. ამ გადაცემის ეთერში გასვლის შემდეგ საზოგადოებაში ათასნაირი აზრი გაჩნდა, რის შემდეგაც ჩვენ სოფოს დავუკავშირდით.
- სოფო, რატომ მიხვედი "სიმართლის დროში?"
- გარდა იმისა, რომ ცოტნესთვის სამაგიეროს გადახდა მინდოდა, იყო ფულადი დაინტერესებაც და ჩემი ერთგვარი პიარიც. ჩემი სურვილი სააგენტოს ხელმძღვანელს, ლიკა ყაზბეგს გავანდე და ერთად მივედით ამ გადაცემის პროდიუსერთან.
- როგორც ვიცი, გადაცემის ჩაწერისას გირეკავდნენ და გემუქრებოდნენ, ამიტომ გამოცვალე ტელეფონის ნომერი?
- მემუქრებოდნენ არა მარტო მე, არამედ ჩემს მეგობრებსაც, რომლებიც მგულშემატკივრობდნენ. ეჭვი გვაქვს, რომ დარბაზში იმყოფებოდნენ ამ ოჯახის ახლობლები, რომლებისგანაც გადიოდა ინფორმაცია ამ გადაცემის შესახებ. ტელეგადაცემის ჩაწერისას მირეკავდნენ და მეუბნებოდნენ, რატომ უკეთებ ამას ცოტნეს, ხომ იცი, რომ შიმშილობს და ისედაც ცუდად არის, წინასწარ გეთქვა ჩვენთვის, დაგარიგებდით მაინცო.
- ამას ვინ გეუბნებოდა?
- ცოტნეს ბიძაშვილი მანანას მხრიდან. მანანა კი მირეკავდა წივილ-კივილით. მასთან ლაპარაკს აზრი არ ჰქონდა, ამიტომ მის ზარებს არ ვპასუხობდი, შემდეგ კი ნომერი გამოვცვალე.სხვათა შორის, ახლა უფრო მემუქრებიან, ვიდრე გადაცემის ჩაწერისას. მეშინია, მაგრამ რა ვქნა?! ქუჩაში მარტო ვერ გავდივარ.
- ერთ-ერთ ინტერვიუში ცოტნე გამსახურდიას ადვოკატმა განაცხადა: სოფო ჩიკვილაძე გამსახურდიების რძალი კი არა, ჩვეულებრივი ქალია ცოტნეს ცხოვრებაშიო.
- ბექაურმა ჩემი და ცოტნეს ცხოვრების დეტალები არ იცის და მიმაჩნია, რომ არ უნდა ჩაერიოს ჩვენს საქმეში. მთელმა საქართველომ გვნახა მე და ცოტნე ზვიად გამსახურდიას გადმოსვენების დღეს და არა მგონია, იმ დღეს მანანას და ცოტნეს გვერდით დაეყენებინათ ისეთი ქალი, როგორადაც შემრაცხეს.
- ეთერში გადაცემის გასვლის შემდეგ რა რეაქცია ჰქონდა ცოტნეს?
- გულის შეტევა დაემართაო, - მითხრეს, მაგრამ არ ვიცი, მართალია თუ არა.
- საზოგადოების ნაწილი ფიქრობს, რომ ვიღაცის შეკვეთით მიხვედით ამ გადაცემაში.
- იმასაც ამბობენ, ვანო მერაბიშვილის შეკვეთა იყო და სანაცვლოდ სოფოს სახლს და მანქანას ჩუქნიანო. ისე, მანქანაზე უარს არ ვიტყვი (იცინის). მოკლედ, ეს სასაცილოდ არ მყოფნის... იქ ისეთი კითხვებიც დამისვეს, რომლებზეც თავად არ მინდოდა პასუხის გაცემა, ანუ არასასიამოვნო იყო ჩემთვის.
- როგორც ვიცი, ცოტნე გამსახურდია ამბობს, ბავშვი, რომელსაც სოფო ელოდება, ჩემი არ არისო..
- ისიც თქვეს, პირველად ვნახეთ ეს გოგო და არც პირველი შვილი, თამარი არის გამსახურდიაო. მაგრამ ხომ შეიძლება დნმ-ის ტესტით გაირკვეს ყველაფერი?
- როგორ გგონია, ცოტნე გამსახურდია ამ ბავშვს გვარს მისცემს?
- ეგ არ ვიცი, მაგრამ ის კი ნამდვილად ვიცი, ცოტნე თუ გაათავისუფლეს, მე ცოცხალი ვერ გადავრჩები.
- ასე რატომ გგონია?
- მემუქრებიან, მეუბნებიან, მანანა გამსახურდია პრეზიდენტის დედასთან, ქალბატონ გიული ალასანიასთან მივა და შენს ლიკვიდაციას მოსთხოვსო. იმასაც მეუბნებიან, ბავშვს სამშობიაროშივე წაგართმევენ და გირჩევნია საქართველო ახლავე დატოვოო.
სოფო ყარალაშვილი
ყოველკვირეული გაზეთი ”ყველა სიახლე”
(გამოდის ხუთშაბათობით)
