რუსეთი დაინტრესებულია უცხოური სამხედრო ტექნიკის წამყვანი მოდელების შესყიდვით, რათა ”ნახოს და შეისწავლოს, თუ რას აკეთებენ სხვა ქვეყნები ”. ამის შესახებ რუსეთის პრეზიდენტმა ფრანგულ ჟურნალ "Paris Match"-თან ინტერვიუში განაცხადა.

მისი თქმით, რუსეთი აპირებს ”მისტრალის” ტიპის სადესანტო ვერტმფრენმზიდის შესყიდვას, რათა შემდეგ ასეთივე თვითონ ააშენოს.

მედვედევმა არ უპასუხა ჟურნალისტის შეკითხვას, აპირებს თუ არა რუსეთის პრეზიდენტი საფრანგეთში 1-3 მარტს ვიზიტის დროს ”მისტრალის” შესყიდვაზე შეთანხმებას. ამასთან, მედვედევმა აღნიშნა, რომ რუსეთი დაინტერესებულია არა მხოლოდ სამხედრო გემებით და არა მხოლოდ საფრანგეთისგან მისი შესყიდვით.

მოლაპარაკებები ”მისტრალის” შესყიდვაზე გასული წლის ზაფხულში დაიწყო. მიმდინარე წლის თებერვალში საფრანგეთმა მოიწონა ეს გარიგება, მოგვიანებით კი შეიარაღების გარეშე მისი გაყიდვის პირობა დადო.

საფრანგეთთან კონტრაქტის გაფორმების შემთხვევაში, ვერტმფრენმზიდს ფრანგული კომპანიები STX France და  DCNS ააშენებენ. მოლაპარალებების დაწყებისას ნავარაუდევი იყო, რომ ხომალდი სამოქალაქო სტანდარტებით - შეიარაღებისა და რადარების გარეშე აშენდებოდა.

”მისტრალის” მშენებლობა რუსულ მხარეს 450-500 მილიონი ევრო, ლიცენზიის ჩათვლით კი 1,5 მილიარდ ევრომდე დაუჯდება.

”მისტრალის” კლასის გემების წყალწყვა 21,3 ათასი ტონაა. მას შეუძლია გადაიტანოს 16 მძიმე, ან 35 მსუბუქი ვერტმფრენი, ასევე სახმელეთო ტექნიკა, სადესანტო კატარღები და გადაიყვანოს  450-დან 900-მდე ჯარისკაცი.

მომზადებულია lenta.ru-ს მიხედვით.