ევროსაბჭო იძულებით გადაადგილებულ პირთა გამოსახლებასთან დაკავშირებით შეშფოთებას გამოხატავს.

როგორც ევროსაბჭოს ოფიციალურ ვებ-გვერდზე გამოქვეყნებულ განცხადებაშია აღნიშნული, ევროპის საბჭოს საპარლამენტო ასამბლეის მიგრაციის, ლტოლვილთა და მოსახლეობის კომიტეტის თავმჯდომარემ ჯონ გრინვეიმ საქართველოს ხელისუფლებას მიმართა და შეშფოთება გამოხატა იმის თაობაზე, თუ რა გზებით განხორციელდა ბოლო დროს თბილისში განთავსებული ოთხი დროებითი თავშესაფარი ცენტრდან იძულებით გადაადგილებულ პირთა გამოსახლება.

"მიუხედავად იმისა, რომ დევნილებს საშუალება ჰქონდათ, არჩევანი გაეკეთებინათ განსახლებასა და ფულად კომპენსაციას შორის, ისინი არ იყვნენ ადეკვატურად ინფორმირებულნი გამოსახლების შესახებ და ფლობდნენ მცირე ან არანაირ ინფორმაციას, თუ სად მოხდებოდა მათი შესახლება, რამაც ვერ მისცა მათ საშუალება ინფორმირებული არჩევანის გაკეთებისა", - ნათქვამია ევროსაბჭოს საპარლამენტო ასამბლეის განცხადებაში.

განცხადებაში მითითებულია, რომ ევროსაბჭოს საპარლამენტო ასამბლეის 2009 წლის 1648 -ე რეზოლუცია მოუწოდებს საქართველოს ხელისუფლებას უზრუნველყოს ბოლოდროინდელი ან უფრო ადრინდელი კონფლიქტების შედეგად იძულებით გადაადგილებულ პირთა უფლებების დაცვა, რათა მიიღონ თავისუფალი გადაწყვეტილება, სურთ თუ არა დაბრუნება, ლოკალურად ინტეგრირება თუ განსახლება ქვეყნის სხვა ნაწილში.

ევროსაბჭო მოუწოდებს საქართველოს ხელისუფლებას, მიიღოს ზომები, რათა იძულებით გადაადგილებულ პირებს მიეცეთ სრული მონაწილეობის საშუალება მათი დაბრუნების, განსახლების თუ რეინტეგრაციის პროცესების დაგეგმვისა და მართვის პროცესებში. "უფრო მეტიც, საერთაშორისო სტანდარტების შესაბამისად, სახელმწიფო ვალდებულია უზრუნველყოს ისეთი პირობების შექმნა, როდესაც იძულებით გადაადგილებული პირებისთვის თანაბრად და სრულად ხელმისაწვდომი იქნება ნორმალური საცხოვრებელი პირობები, აუცილებელი საარსებო წყაროს არსებობა, განათლება და ძირითადი სერვისები", - ნათქვამია განცხადებაში.

მიგრაციის, ლტოლვილთა და მოსახლეობის კომიტეტის თავმჯდომარე მოუწოდებს საქართველოს ხელისუფლებას, არ გააგრძელოს გამოსახლების პროცესი ვიდრე არ მოხდება შესაბამისი სამართლებრივი საკითხების გარკვევა და არ შეიქმნება მდგრადი განსახლებისთვის საჭირო პირობები, ძირითადი სერვისებისა და სამუშაო ადგილების ხელმისაწვდომობის ჩათვლით.


"ინტერპრესნიუსი"