აი, თვითონ გაჩეჩილაძემ კი მილანური ვოიაჟის შემდეგ ასევე ტელეკამერების წინ თქვა, დროა, ეს ავტორიტეტული ხელისუფლება დავამარცხოთო. ასეთი კომპლიმენტი მოქმედი ხელისუფლებისთვის კარგა ხანია არავის უთქვამს და ეჭვი მაქვს, თუ რომელიმეს, ნებსით თუ უნებლიეთ, შეცდომა არ მოუვა, არც უახლოეს მომავალში ეტყვიან. სამაგიეროდ, ძლიერნი ამა ქვეყნისა ერთმანეთის მიმართ დითირამბებს არ იშურებენ. ამ რამდენიმე დღის წინ გოკა გაბაშვილმა გიგი უგულავა ისე შეაქო, თავდაპირველად ვიფიქრე, სიტყვის ბოლოს გალაკტიონის "მერისაც" მიაყოლებს-მეთქი, მაგრამ ან დაეზარა, ან მერის "მერით" მოფერება სამომავლოდ გადადო.
გაზაფხულზე საქართველოში ყოველთვის ვიღაცის დაბრუნებას ველით. გასულ გაზაფხულზე, მაგალითად, მთელი თბილისი ირაკლი ოქრუაშვილის ჩამოსვლას ელოდა, მაგრამ რადგანაც მის ჩამოსვლას განსაკუთრებით ბატონი ივანე ელოდა, ოქრუაშვილმა გადაიფიქრა. კი არ გადაიფიქრა, ოპოზიციამ ვერ ივარგა და ხელისუფლება ვერ შეცვალა, თორემ ვნახავდით ბატონ ირაკლის თეთრ "ბოინგზე" ამხედრებულსა და თეთრი ნაბდით მოსილს, ირგვლივ ქვიშასავით ჯარიც რომ დაეხვეოდა...
ახლა კიდევ ინგა გრიგოლიას ველოდებით. იმედია, თბილისში დაბრუნების შემდეგ ჩვენი ინგა არ იტყვის, მე ლონდონში ვსწავლობდიო და ისეთივე ენერგიული იქნება, როგორიც აქედან გავუშვით. ქრისტიან-დემოკრატებს გრიგოლიას წარდგენა თბილისის საკრებულოს თავმჯდომარის პოსტზე სურთ და არის ამაში ლოგიკა. რამდენი ხანია გვეუბნებიან, საკრებულოს მუშაობა საჯაროა და ნებისმიერ მოქალაქეს შეუძლია სხდომებს დაესწროს და მოისმინოს, როგორ მუშაობს ეს ორგანოო და, თუ ინგა ამ თანამდებობას დაიკავებს, დასწრება არ დაგვჭირდება, გრიგოლიას მიერ წაყვანილ სხდომებს ისედაც ყველა მოვისმენთ. მერე გიორგი თარგამაძეც გადაარქმევს პარტიას სახელს, დაარქმევს "დროებას" და მე თქვენ გეტყვით, ცუდი დროება დაუდგებათ?!
საქართველოს პრეზიდენტმა ბათუმში წარმოთქმულ სეფესიტყვაში განაცხადა, საქართველო ესტონეთს დაეწია და ბევრ რამეში გაუსწრო კიდეცო. სიმართლე გითხრათ, გამიხარდა და მაშინვე ერთ მეგობარ ესტონელს დავუკავშირდი, თქვე მაჩანჩალებო, გაგისწარით და აწი თქვენ გვდიეთ-მეთქი. ისიც დაინტერესდა, რაში გაგვისწარითო და აქაური და იქაური ამბები შევადარეთ. როგორც გავარკვიეთ, იქ ხელფასი 1200 ევროდან იწყება, პენსია - 400 ევროდან, სადაზღვევო კომპანიები, პრაქტიკულად, ყველაფერს იხდიან, უმუშევრობა მოსახლეობის მხოლოდ ათ პროცენტს აწუხებს და როგორც მეგობარმა ამიხსნა, ისინი ზარმაცები არიან, თორემ სამუშაო არის, ხელფასის დანაზოგით თავისუფლად შეგიძლია ზაფხულში შვებულება რომელიმე ევროპულ კურორტზე გაატარო და... ბატონო პრეზიდენტო, დაგვიკონკრეტეთ ხოლმე, რას გულისხმობთ, როცა ამბობთ, რომ ამა თუ იმ ქვეყანას გავუსწარით, თორემ ხომ ხედავთ, რა დღეში ვართ.
P.S ინგა გვყავს, კუკარაჩა ხომ გვყავს და გვყავს, საინტერესო ის არის, მურტალო ვინ იქნება. გამგებმა გაიგოს - მურტალოს როლისთვის მხოლოდ გინება და მუქარა არ გამოდგება!
არმაზ ხარძიანი
ყოველკვირეული გაზეთი ”ყველა სიახლე”
(გამოდის ხუთშაბათობით)
