ბორის ბერეზოვსკი საქართველოს პრეზიდენტ მიხეილ სააკაშვილთან  ბათუმში  შეხვედრის შესახებ გავრცელებულ ინფორმაციას უარყოფს, თუმცა აღნიშნავს, რომ „მზად არის შეხვდეს ყველას, ვისაც საქართველოს დასავლეთის ცივილიზაციის ნაწილად გახდომა სურს“.

როგორც ბერეზოვსკიმ „ინტერპრესნიუსს“ სატელეფონო საუბრისას განუცხადა, იმის გამო, რომ რუსეთის სპეცსამსახურები მის გადაადგილებაზე თვალ-ყურის დევნებას განაგრძობენ,  იძულებულია, არ აკეთოს კომენტარები გადაადგილების შესახებ.
მისივე თქმით,  საქართველო ისევე უყვარს და მისადმი ინტერსს ისევ გამოხატავს, როგორც  - ადრე.

კითხვაზე, თუ რაში გამოიხატება საქართველოსადმი მისი ინტერესი და ამისთვის მზად არის, თუ არა ეკონტაქტოს პრეზიდენტ სააკაშვილს, რუსეთიდან დევნილმა ოლიგარქმა განაცხადა: „სინამდვილეში საქართველოსადმი ინტერესი იმაში გამოიხატება, რომ მინდა საქართველო დასავლური ცივილიზაციის ნაწილი გახდეს”.

ამისათვის კი, მისივე თქმით,  მზად არის, შეხვდეს და საქმიანი ურთიერთობა ჰქონდეს ყველასთან, მათ შორის  - საქართველოს პრეზიდენტ მიხეილ სააკაშვილთან.

სააკაშვილისა და ბერეზოვსკის ბათუმში კონფიდენციალური შეხვედრის შესახებ განცხადება  დღეს, მოძრაოაბა „თეთრების“ ლიდერმა თემურ შაშიაშვილმა გააკეთა. შაშიაშვილის მტკიცებით, სააკაშვილი-ბერეზოვსკის შეხვედრა ზუგდიდელი ბიზნესმენის, ვინმე ქარჩავას ორგანიზებული იყო.

"ინტერპრესნიუსი"