მისივე თქმით, ყველანაირი საუბარი მისი კანდიდატურის მოხსნასთან დაკავშირებით, უსაფუძვლოა.
“ყველანაირი მითქმა-მოთქმა, რომ შესაძლებელია, ვიღაცის სასარგებლოდ მოვხსნა კანდიდატურა, არის უსაფუძვლო. ჩემი კანდიდატურა უკვე დაყენებულია, მე უკვე დაწყებული მაქვს კამპანია და ამ გადაწყვეტილებაში არაფერი შეიცვლება”, – განაცხადა ალასანიამ.
“ალიანსის” ლიდერმა აღნიშნა, რომ ყველა გადაწყვეტილებას იღებს “ალიანსთან” შეთანხმებით.
“ჩვენს პოლიტიკურ ძალას უკვე გამოუცხადა მხარდაჭერა პოლიტიკური ოპოზიციური პარტიების ნაწილმა, საზოგადოების დიდმა ნაწილმა. ეს მხარდაჭერა მაძლევს იმედს და პასუხისმგებლობას, რომ ამ ბრძოლაში ბოლომდე უნდა გავიდე”, – განაცხადა ირაკლი ალასანიამ.
ამასთან, მანვე განმარტა, რომ პრაიმერისა და სოციოლოგიური გამოკითხვების თემა უკვე დახურულია.
“ალიანსისთვის პრაიმერისა და გამოკითხვის თემები უკვე დახურულია. ამაზე დროის ხარჯვა არ ღირს. ახლა ამომრჩევლებს იმ საკითხებზე უნდა ველაპარაკო, კონკრეტულად რის გაკეთებას ვაპირებ იმ შემთხვევაში, თუკი არჩევნებში გავიმარჯვებ და რატომ უნდა მომცენ მათ ხმა”, – განაცხადა ალასანიამ.
