გვესაუბრებიან "ქრისტიან-დემოკრატიული" პარტიის წევრები, დეპუტატები მაგდა ანიკაშვილი და გიორგი ახვლედიანი:
- ქალბატონო მაგდა, რატომ დაასახელეთ მაინცდამაინც ინგა გრიგოლია საკრებულოს თავმჯდომარეობის კანდიდატად?
- ინგამ დაამტკიცა, რომ არის პრინციპული, სამართლიანი და სანდო ადამიანი. თუ საზოგადოება მას დაუჭერს მხარს, სწორ არჩევანს გააკეთებს. ინგასთან მოლაპარაკება დიდი ხანია მიმდინარეობს. ჯერ კიდევ 2008 წლის საპარლამენტო არჩევნებისას ვაწარმოებდით მასთან კონსულტაციებს - დიდი იყო ჩვენი მხრიდან ინგასთან თანამშრომლობის სურვილი, მაგრამ იმხანად ეს ვერ მოხერხდა, თუმცა ამ არჩევნებზე გადაწყდა, რომ ინგა ჩვენს გვერდით იქნებოდა.
- გაქვთ ინგას გამარჯვების იმედი?
- რა თქმა უნდა. ინგა არის საუკეთესო კანდიდატი და ეს რომ ასეა, საზოგადოების დიდმა ნაწილმაც იცის.
- როდის ჩამოდის ინგა ლონდონიდან?
- ზუსტად ვერ გეტყვით, თუმცა ინგა ძალიან მალე და ძალიან აქტიურად ჩაერთვება საარჩევნო კამპანიაში. დარწმუნებული ვარ, ცნობილი ჟურნალისტი კარგი პოლიტიკოსი გახდება, რომელიც "ქრისტიან-დემოკრატების" სახელით გამოვა დიდ პოლიტიკაში.
- ბატონო გიორგი, ამბობენ, ქრისტიან-დემოკრატებმა გია ჭანტურია მერობის კანდიდატად იმიტომ წამოაყენეს, რომ არასაპარლამენტო ოპოზიციის კანდიდატს წაართვან ხმებიო.
- როდესაც გამოცხადდა, რომ გაზაფხულზე იწყება საარჩევნო კამპანია, ჩვენ ყველა ოპოზიციურ ძალას მივმართეთ, სასწრაფოდ დავმსხდარიყავით და შევთანხმებულიყავით საერთო კანდიდატზე, რათა უგულავას დამარცხება არ გაგვჭირვებოდა. მაგრამ ოპოზიციის ზოგიერთმა ლიდერმა პრაიმერზე დაიწყო ლაპარაკი. არადა, პრაიმერის იდეის ავტორებმა კარგად იცოდნენ, რომ ამ გზით ვერ გამოავლენდნენ საერთო ოპოზიციურ კანდიდატს.
მოკლედ, მოლაპარაკება-დარწმუნება-გადარწმუნების პროცესში ვიყავით, როდესაც "ალიანსიდან" მერის კანდიდატად ირაკლი ალასანია წამოაყენეს. დანარჩენი პოლიტიკური ძალები კი დაგვაყენეს ფაქტის წინაშე.
ამ მოქმედებით "ალიანსელებმა" გვითხრეს, რომ ჩვენ უკვე გვყავს ლიდერი და თუ გსურთ ერთიანი კანდიდატით გამოსვლა, შემოგვიერთდით, თუ არა და, მოღალატეები იქნებითო. არადა, ერთად რომ დავმსხდარიყავით და შეგვეჯერებინა ჩვენი აზრები, შეიძლება დაგვესახელებინა ირაკლი ალასანია ან ვინმე სხვა. ასეთი მიდგომა, როგორც "ალიანსელები" მოიქცნენ, პოლიტიკაში არ შეიძლება. ჩვენ ყველაზე ბოლოს გამოვაცხადეთ ჩვენი კანდიდატი.
ასე რომ, ჩვენ ირაკლი ალასანიას კი არა, უგულავას ვებრძვით. ჩვენი კანდიდატი რადიკალურ ოპოზიციას ნაკლებად წაართმევს ხმებს და მალე ნახავთ, რაც მოხდება ლევან გაჩეჩილაძესა და ირაკლი ალასანიას შორის ხმების გადანაწილების თვალსაზრისით. ორივე დაღუპავს ერთმანეთს.
ნინო მაისურაძე
ყოველკვირეული გაზეთი ”ყველა სიახლე”
(გამოდის ხუთშაბათობით)
