"კონსულტაციები ოპოზიციის ერთიანი კანდიდატის გამოვლენისთვის გრძელდება და საკმარისი დროა იმისთვის, რომ პოლიტიკურ ძალებს შორის რაიმე შეთანხმება მოხერხდეს" - განუცხადა ჟურნალისტებს “ალიანსი საქართველოსთვის” ერთ-ერთმა ლიდერმა, ვიქტორ დოლიძემ.

მისი აზრით, ოპოზიცია უნდა შეჯერდეს ყველაზე რეიტინგულ კანდიდატზე, რათა სახელისუფლო კანდიდატი დაამარცხონ, ასეთი კანდიდატი კი, მისივე თქმით, ირაკლი ალასანიაა.

ამასთან, ვიქტორ დოლიძე აცხადებს, რომ ლევან გაჩეჩილაძესა და ირაკლი ალასანიას შორის დაპირისპირების შესახებ გავრცელებული ინფორმაცია სახელისუფლო  მედიის წარმოებული კამპანიაა და სიმართლეს არ შეესაბამება.

“ლევან გაჩეჩილაძესა და ირაკლი ალასანიას შორის არანაირი დაპირისპირება არ ყოფილა და ეს სახელისუფლო მედიის მიერ წარმოებული კამპანიაა. დღეს საუბარია ერთიანი ოპოზიციური კანდიდატის გამოვლენაზე, რაც ოპოზიციის გამარჯვების საფუძველი უნდა გახდეს.

გაჩეჩილაძის მოსაზრებაა, რომ პოლიტიკურმა ძალებმა მსვლელობა მისი ხედვის საფუძველზე გააგრძელონ. “ალიანსს” მოლაპარაკების პროცესი ჯერ არ დაუსრულებია. ჩვენ ვესწრაფვით ერთიანი კანდიდატის გამოვლენისთვის და მზად ვართ მოლაპარაკებისთვის ყველა პოლიტიკურ ძალასთან,  საზოგადოების წარმომადგენლებთან. საკმარისი დროა იმისთვის, რომ რაიმე შეთანხმებამდე მივიდეთ. ყველა პოლიტიკურ მოძრაობას ჰყავს თავისი კანდიდატი, მაგრამ  აქ არის რეიტინგის საკითხიც. ალასანია ყველაზე რეიტინგულ კანდიდატს წარმოადგენს და ვფიქრობთ, რომ ის უნდა იყოს ერთიანი კანდიდატი”, - განაცხადა ვიქტორ დოლიძემ.

"ინტერპრესნიუსი"