ევროატლანტიკურ სტრუქტურებში ინტეგრაციის საკითხებში სახელმწიფო მინისტრი გიორგი ბარამიძე მიიჩნევს, რომ რუსეთს საქართველოსთან მიმართებაში ემბარგოს მოხსნა 2 მიზეზის გამო აქვს დაგეგმილი.
“როგორც ჩანს, რუსეთს დაგეგმილი აქვს მოხსნას ემბარგო, მაგრამ მოხსნას არა იმიტომ, რომ საქართველო უყვარს, არამედ იმიტომ, რომ ქმნის საბაჟო კავშირს ბელორუსსა და ყაზახეთთან; ასეთ შემთხვევაში კი, ქართული პროდუქცია რუსეთის ბაზარზე ნებისმიერ შემთხვევაში ისედაც შეაღწევს”, - აღნიშნა ბარამიძემ ჟურნალისტებთან საუბრისას.
მეორე მიზეზი კი, გიორგი ბარამიძის აზრით, ის არის, რომ რუსეთს სჭირდება საკუთარი მარიონეტები, საქართველოს მოღალატეებისთვის გარკვეული პოლიტიკური ფონის შექმნა, რათა შემდეგ თქვას, რომ ისინი არიან დიდი პოლიტიკოსები, რომლებმაც ასეთი მნიშვნელოვანი საქმის გაკეთება მოახერხეს.
“გამორიცხული არ არის, რომ საუბარი მომავალში შეეხოს სატრანსპორტო და საავიაციო მიმოსვლის აღდგენას. ასევე, დაიწყოს საუბარი სხვა საკითხებზე, რომლებიც თავად შეწყვიტა რუსეთმა, რათა ქართული სახელმწიფოებრიობა დაემხო. ახლა კი, ამის გაკეთებას სხვადასხვა მიზეზებით აპირებს, მათ შორის იმიტომ, რომ იძულებულია, მაგრამ მიზანი არის იგივე - დაამხოს ქართული სახელმწიფოებრიობა და მოიყვანოს ხელისუფლებაში ყურმოჭრილი მონები, რომლებიც მზად არიან, ოკუპაციის პირობებში ოკუპანტს თავმოდრეკილი ეახლონ”, - განაცხადა გია ბარამიძემ.
როგორც ცნობილია, “მოძრაობა სამართლიანი საქართველოს” ლიდერი ლიდერი ზურაბ ნოღაიდელი მოსკოვში იმყოფება. არსებული ინფორმაციით, მოსკოვში გამართულ შეხვედრებზე საუბარი შეეხება ორ ქვეყანას შორის საჰაერო მიმოსვლის შესაძლო აღდგენასა და რუსულ ბაზარზე ქართული პროდუქციის ექსპორტის განახლებას.
"ინტერპრესნიუსი"
15:59 / 10-03-2010
გიორგი ბარამიძე რუსეთის მიერ ემბარგოს მოხსნას არ გამორიცხავს
