ნატო-ს გენერალური მდივანი ანდერს ფოგ რასმუსენი არ გამორიცხავს ავღანეთში ჩრდილო-ატლანტიკური ალიანსის ოპერაციასთან რუსეთის შესაძლო მიერთებას.

”ვფიქრობ, შესაძლებელია ავღანეთში ჩვენს ოპერაციაში რუსეთის შემდგომი მონაწილეობა”, - განაცხადა რასმუსენმა 7 თებერვალს მიუნხენის უსაფრთხოების 46-ე კონფერენციაზე - იტყობინება რია ”ნოვოსტი”.

რასმუსენის აზრით, რუსეთის ხელისუფლება იზიარებს ნატო-ს ქვეყნების შეშფოთებას ავღანეთში ბოლო წლებში შექმნილ ვითარებასთან დაკავშირებით.

მისივე თქმით, თუ ავღანეთი კვლავაც გახდება ტერორისტების თავშესაფარი, რუსეთისთვის იოლი არ იქნება ნარკოტიკების გავრცელებასთან დაკავშირებული სიტუაციის გაწონასწორება.

სწორედ ამიტომაა დარწმუნებული რასმუსენი, რომ რუსეთმა შეიძლება მონაწილეობა მიიღოს ავღანეთის ოპერაციაში.

მომზადებულია newsru.com-ის მიხედვით.