აშშ-ის ბირთვული არსენალი, რუსეთთან სტრატეგიული შეტევითი შეიარაღების შემცირებაზე დადებული ახალი შეთანხმების შესრულების შემდეგაც კი, საკმაოდ ბრძოლისუნარიანია საიმისოდ, რომ რუსეთის მიერ შეთანხმების დარღვევის მცდელობა აღკვეთოს, - ამის შესახებ პენტაგონის ხელმძღვანელმა რობერტ გეითსმა ამერიკელ სენატორებს წერილობით აცნობა.

რუსეთისა და აშშ-ის პრეზიდენტებმა სტრატეგულ შეტევით იარაღზე ახალ შეთანხმებას ხელი 2010 წლის 8 აპრილს პრაღაში მოაწერეს, რაც ამ ტიპის შეიარაღების მნიშვნელოვან შემცირებას ითვალისწინებს.

ამერიკის სამხედრო უწყების ხელმძღვანელის თქმით, თუკი რუსეთი შეთანხმების პირობებს დაარღვევს, პენტაგონი ბირვული რაკეტებით აღჭურვილ თავის სუბმარინებსა და ბომბდამშენებს გაძლიერებულ სამხედრო მზადყოფნაში მოიყვანს.

"ამრიგად, აშშ-ის ბირთვული შეტევითი არსენალი საკმარისად მოქნილი და ქმედითია იმისთვის, რომ რუსეთის მომავალ ლიდერებს შეთანხმების ნაწილობრივ, ან მთლიანად დარღვევის სურვილი საფუძველშივე გაუქროს", - ნათქვამია გეითსის წერილში.

სენატის საერთაშორისო საქმეთა კომიტეტმა მომავალ კვირაში შეთანხმება განსახილველად პალატის მთლიან შემადგენლობას და კონგრესის სენატს უნდა წარუდგინოს. რუსულ-ამერიკული შეთანხმება თავის მხრივ, რუსეთის პარლამენტის ორივე პალატამაც უნდა განიხილოს. ამის შემდეგ მოსკოვი და ვაშინგტონი დოკუმენტის რატიფიცირებას ერთდროულად განახორციელებენ.

მომზადებულია Associated Press-ის მიხედვით.