ჰომოსექსუალების მოწინააღმდეგე ამერიკელმა სენატორმა, საჯაროდ აღიარა საკუთარი არატრადიციული ორიენტაციის შესახებ.

ამერიკელმა სენატორმა რესპუბლიკური პარტიიდან როი ეშბურნმა, რომელიც კენჭისყრებზე ხმას ყოველთვის სექსუალური უმცირესობების უფლებების დაცვის წინააღმდეგ აძლევდა, პოსტზე 14-წლიანი ყოფნის შემდეგ საჯაროდ აღიარა, რომ ჰომოსექსუალია.

მოულოდნელი აღიარება მან ამ საკითხისადმი კონსერვატიული მიდგომით გამორჩეულ  კალიფორნიაში, ადგილობრივი რადიოს ეთერში გააკეთა. როი ეშბურნი ამერიკის სენატში სწორედ კალიფორნიის შტატს წარმოადგენს, სადაც აკრძალულია ერთსქესიანი ქორწინება.

4 შვილის მამამ, 55 წლის ეშბურნმა ინტერვიუში განაცხადა, რომ სენატში მისი ხმა ამომრჩევლის აზრს გამოხატავს და არა მის საკუთარ მოსაზრებას - იტყობინება BBC.

აღსანიშნავია, რომ გასულ წელს სენატორი ჰომოსექსუალების უფლებების დამცველი მოკლული აქტივისტის, ჰარვი მილკის ხსოვნის დღის დაწესების წინააღმდეგ წავიდა.

თავისი გულწრფელობა სენატორმა ახსნა სურვილით, პასუხი გაეცა მოარული ჭორებისთვის იმის თაობაზე, რომ ამ დღეებში საკრამენტოში იგი ჰომოსექსუალთა ღამის კლუბს სტუმრობდა.  ეს მოხდა მანამ, ვიდრე სენატორს არაფხიზელ მდგომარეობაში მანქანის მართვისთვის დააკავებდნენ.

როი ეშბურნმა ასევე განაცხადა, რომ სენატორის უფლებამოსილების ვადის ამოწურვის შემდეგ აღარ აპირებს პოლიტიკურ და საზოგადოებრივ მოღვაწეობას.

მომზადებულია newsru.com-ის მიხედვით.