გაეროს უშიშროების საბჭო მიესალმება 7 მარტს  ერაყში ჩატარებულ საპარლამენტო არჩევნებს და მკვეთრად აკრიტიკებს  ექსტრემისტების მცდელობას, ტერაქტების გზით ჩაეშალათ იგი - ნათქვამია  გაეროს უშიშროების საბჭოს თავმჯდომარის განცხადებაში.

ერაყელებს მიულოცა ასევე გაეროს გენერალურმა მდივანმა პან გი მუნმა, რომლის თქმით, უსაფრთხოების მხრივ არსებულ  ურთულეს პირობებში ერაყელებმა გამოიყენეს კონსტიტუციით მინიჭებული - ხმის უფლება.

მიუხედავად უსაფრთხოების უპრეცენდენტო ზომებისა, არჩევნების დღეს აფეთქებებმა 38 ადამიანი იმსხვერპლა, 100 ადამიანი დაჭრილია. წინასწარი მონცემებით, არჩევნებში მონაწილეობა მიიღო ამომრჩეველთა 62,3 %-მა, რამაც, გაეროს მისიის აზრით, ყოველგვარ მოლოდინს გადააჭარბა.

ერაყისთვის ეს არჩევნები უდიდესი მნიშვნელობის მქონეა, რადგან მან უნდა განსაზღვროს  ქვეყნის ბედი მომდევნო 4 წლის განმავლობაში. ამერიკის ჯარის ერაყიდან გასვლის პროცესს სწორედ ახალი პარლამენტის მიერ არჩეულმა მთავრობამ უნდა ადევნოს თვალყური.

ამასთან, როგორც ტელეკომპანია ”ალ-ჯაზირა” იუწყება, ერაყის პრემიერ-მინისტრის ბლოკი სახელწოდებით ”კანონის სახელმწიფო”  ბაღდადსა და  ქვეყნის სამხრეთ პროვინციებში გამარჯვების შესახებ განცხადების გასაკეთებლად ემზადება.
ისლამური პარტიის  ”ალ დაავა”  ერთ-ერთი ლიდერის ჰეიდარ ალ აბადის განცხადებით, ნური ალ მალიკის მომხრეები ეთანხმებიან არჩევნების წინასწარ მონაცემებს, რომლის თანახმად, 10-18 პროვინციაში ლიდერობენ.

”იტარ-ტასი”-ს ცნობით, გავლენიანი პროირანული დაჯგუფების -  ერაყის უმაღლესი ისლამური საბჭოს წარმომადგენელი, აპროტესტებს წინასწარ შედეგებს და აცხადებს, რომ ერაყის ნაციონალური კოალიციას შიიტურ ოლქებში პრემიერის ბლოკთან თანაბარი შედეგები აქვს.

მომზადებულია rian.ru-ს და  newsru.com-ის მიხედვით.