ფართო მოხმარების წამლების სიძვირე კარგა ხანია საქართველოს მოსახლეობის ერთ-ერთ მტკივნეულ პრობლემად რჩება. ჯანდაცვის მინისტრის, ალექსანდრე კვიტაშვილის განცხადებით, ოცამდე დასახელების პრეპარატის, მათ შორის ვალიდოლის, კორვალოლის და ნოშპის ქვეყანაში შემოტანის უფლება მხოლოდ ერთ უკრაინულ ფარმაცევტულ კომპანიას ჰქონდა. ამის გამო ამ პრეპარატებზე ფასმა 20-30%-ით მოიმატა.

მინისტრის თქმით, დაახლოებით 50-100 დასახელების წამლის ექსკლუზიური შემოტანის უფლება არც ერთ კომპანიას აღარ ექნება და მათ რამდენიმე კომპანია შემოიტანს, მედიკამენტების ფასებით თამაში რომ არ მოხდეს.

კოკა ფრუიძე, ჯანდაცვის მინისტრის მოადგილე:
- ვიცით, როგორ უჭირს მოსახლეობის დიდ ნაწილს წამლების შეძენა სიძვირის გამო. ამიტომ ყველა ის ღონისძიება, რომელსაც ჩვენი სამინისტრო ამ კუთხით მიმართავს, სწორედ წამლების ფასების დარეგულირებას ითვალისწინებს.

ლიკა კერატიშვილი

ყოველკვირეული გაზეთი ”ყველა სიახლე”
(გამოდის ხუთშაბათობით)