რეჟისორი ჯეიმს კემერონი ამაზონის კსიკრინ-კაიაპოს ტომის ინდიელების შესახებ, "ავატარის" მსგავსად, 3D ფორმატის ფილმის გადაღებას აპირებს, იტყობინება AFP.

კემერონი უკვე ორჯერ შეხვდა ტომის ბელადებს და ამაზონის შენაკადზე კაშხლის მშენებლობასთან დაკავშირებით მათ პროტესტს მხარი დაუჭირა. როგორც ინდიელები აცხადებენ, კაშხლის მშენებლობა მათი მიწების დატბორვას გამოიწვევს. ეკოლოგების პროტესტის მიუხედავად, კაშხლის მშენებლობის გადაწყვეტილება აგვისტოს ბოლოს ბრაზილიის პრეზიდენტმა ლუის ინასიო ლულა და სილვამ მიიღო. ხელისუფლება აცხადებს, რომ ძირძველი მოსახლეობის მიწები არ დაიტბორება.

ამ მოგზაურობის დროს კემერონმა ტომის ცხოვრების შესახებ მოკლე ფილმის გადაღება მოასწრო, თუმცა ის ჩვეულებრივი ფორმატისაა და არა 3D-ის. ჯერჯერობით უცნობია, როდის გამოვა 3D ფორმატის ფილმი კსიკრინ-კაიაპოს ტომის ინდიელების შესახებ. როგორც კემერონმა განაცხადა, "ავატარი" სწორედ იმ საკითხებს შეეხებოდა, რომლებიც ამ ტომის ინდიელებს აღელვებთ.


მომზადებულია afp.com-ის მიხედვით.