ახლახან გაქირავებაში გამოვიდა მარკ სტივენ ჯონსონის ახალი კომედია "ერთხელ რომში", რომელშიც მთავარი როლი ჰოლივუდის ამომავალმა ვარსკვლავმა კრისტენ ბელმა შეასრულა. რამდენიმე დღის წინ კრისტენმა და ამავე ფილმში ერთ-ერთი მთავარი როლის შემსრულებელმა დექს შეპარდმა ნიშნობის შესახებ გამოაცხადეს.

დოსიე

კრისტენი 1980 წლის 18 ივლისს დაიბადა აშშ-ის ქალაქ ჰანტინგტონ ვუდსში. ნიუ-იორკში პრესტიჟული ხელოვნების სკოლა დაამთავრა 2001 წელს. მონაწილეობდა თეატრალურ და მუსიკალურ დადგმებში. ბროდვეიზე დებიუტი ჰქონდა ბეკი ტეტჩერის როლში "ტომ სოიერის თავგადასავლიდან". კინოში კი პირველი როლი იყო ფილმში "პოლონური ქორწილი". სახელი გაითქვა მთავარი როლით სერიალში "ვერონიკა მარსი". ბოლო ნამუშევრებია სერიალი "გმირი", ფილმები "ჭორიკანა" და "სიყვარულის ფორმულა ქორწინების ტყვეებისთვის".


"ჩემი გმირივით მოუქნელი ვარ"

- ისეთივე შრომისმოყვარე ხართ, როგორიც თქვენი გმირი ახალ ფილმში?
- ვფიქრობ, რომ პირადი ცხოვრება სამსახურზე მნიშვნელოვანია. მიყვარს მუშაობა, მაგრამ დასვენებაც მიყვარს. თანაც, მირჩევნია, ორივეში მაქსიმალურად დავიხარჯო (იცინის). ამიტომ ვფიქრობ, რომ ალბათ ვარ შრომისმოყვარე. ბედის მადლიერი ვარ, რომ ახლა ბევრი სამუშაო მაქვს.

- თქვენი ახალი გმირი რა პროფესიისაა?
- გალერისტია, მანჰეტენზე გუგენჰაიმის მუზეუმს კურირებს. რომში დის ქორწილზე ჩავიდა და მეტისმეტად ბევრი დალია. ყველაფერი იმით დასრულდა, რომ შადრევნიდან მონეტების ამოღება სცადა, რომლებიც ტურისტებმა ისროლეს. საქმე ის არის, რომ თუ ჩვეულებრივ შადრევანში მონეტებს ყრიან, რომ იმ ადგილას დაბრუნდნენ, ამ შადრევანში იმისთვის ყრიდნენ, რომ სიყვარული ეპოვათ.

- ეს ხომ ცრურწმენაა. თქვენ თუ ხართ ცრუმორწმუნე?
- არა. მე არ მეშინია ორშაბათის, შავი კატისა და 13 რიცხვის.

- ადვილი იყო ამ ფილმზე მუშაობა?
- ისეთ გარემოცვაში, რომელშიც აღმოვჩნდი, ადვილი არ იყო - ხანდახან მთელი დღე სიცილი მიწევდა.

- ეს თქვენი სამსახიობო ილეთია - ითამაშოთ კომიკური სცენები სახის სერიოზული გამომეტყველებით?
- თან კი და თან არა. პირველ რიგში, ვცდილობ ჩემი პერსონაჟების ხასიათის შესაბამისად ვიმოქმედო. საბედნიეროდ, ჩემი გმირი ბეტი სცენარის მიხედვით მოუქნელი იყო. მეც საკმაოდ მოუქნელი ვარ ცხოვრებაში, რაც ეკრანზე გადავიტანე. არ დამჭირდა დიდი ვარჯიში ან რამე გამოკვლევის ჩატარება როლისთვის - საკუთარი თავი ვითამაშე.

- გინდათ თქვათ, რომ ხშირად ეცემით ან რამეს ეჯახებით?
- კი, მე ნამდვილად არ ვარ ამქვეყნად ყველაზე კარგი კოორდინაციის მქონე ადამიანი.

- რომმა როგორი შთაბეჭდილება მოახდინა თქვენზე?
- შესანიშნავი! თუმცა სამწუხაროა, რომ ადგილობრივ მცხოვრებლებს ჯერ რატომღაც არ აღმოუჩენიათ კონდიციონერები. ჩვენ მეტისმეტად განებივრებულები ვართ იმით, რომ ლამის ყველა ოთახში კონდიციონერი გვაქვს. ეს მცირე დისკომფორტს მიქმნიდა.

- ფილმში თქვენმა გმირმა ჯოშ დიუმელის გმირი აირჩია. იმ ბიჭებიდან, ვისაც თქვენი პერსონაჟი შეუყვარდა, რეალურ ცხოვრებაში რომელს აირჩევდით?
- (იცინის) ალბათ მაინც ჯოშს ავირჩევდი.

ჟურნალი "რეიტინგი"
(გამოდის ორშაბათობით)