საქართველოს ვუყურებთ, როგორც მნიშვნელოვან სტრატეგიულ პარტნიორსა და მოკავშირეს , - ეს განცხადება აშშ-ის ვაჭრობის დეპარტამენტის მდივნის მეორე მოადგილემ ევროპისა და ევრაზიის საკითხებში ხუან ვერდემ ამერიკა-საქართველოს ბიზნესსამიტზე გააკეთა.
"მინდა, მივულოცო საქართველოს წარმატებული რეფორმების გატარება. ჩვენ საქართველოს ვუყურებთ, როგორც მნიშვნელოვან სტრატეგიულ პარტნიორსა და მოკავშირეს. ამერიკის მთავრობა მხარს უჭერს საქართველოს დამოუკიდებლობასა და ეკონომიკურ განვითარებას. ჩვენ ვცდილობთ, ხელი შევუწყოთ, რომ ინვესტორების ნდობა საქართველოს მიმართ გაიზარდოს", - აღნიშნა ვერდემ.
მისივე თქმით, საქართველოში ნამდვილად მიმდინარეობს ეკონიმიკის ლიბერალიზაცია, მცირდება ბარიერები.
"გვინდა, რომ საქართველოსთან თანამშრომლობა იყოს ურთიერთსასარგებლო. ჩვენ ამერიკის ბიზნესწრეებს მივაწვდით ინფორმაციას საქართველოს სავაჭრო და საინვესტიციო შესაძლებლობებზე. საქართველოს დავეხმარებით ტექნიკური პროგრამებით, ვიმუშავებთ საქართველოს მთავრობასა და კერძო სექტორის წარმომადგენლებთან. გვჯერა, რომ საქართველოს მთავრობა ქვეყნის ძლიერ მომავალს ააშენებს. იმედია, ყველანი ვიამაყებთ ამ მომავლით", აღნიშნა ვერდემ.
სასტუმრო "თბილისი მარიოტში" ამერიკა-საქართველოს ბიზნესსამიტი დღეს გაიხსნა.
"ინტერპრესნიუსი"
11:38 / 08-09-2010
ხუან ვერდე - საქართველოს ვუყურებთ, როგორც მნიშვნელოვან სტრატეგიულ პარტნიორსა და მოკავშირეს
