ბელორუსის ისტორიაში ზამთრის ოლიმპიადების პირველი ჩემპიონი ალექსეი გრიშინი გახდა. ფრისტაილის სახეობა აკრობატიკაში მოასპარეზე სპორტსმენმა უმძიმესი კონკურენცია დაძლია და სამშობლოს ნანატრი ოქროს მედალი მოუტანა.

პირველი ნახტომის შემდეგ, გრიშინი მეორე გახლდათ, დასკვნითი ცდისას კი ურთულესი ბრუნი შეასრულა და ამერიკელი ჯერეტ პეტერსონი და ჩინელი ჟონგქინგ ლიუ უკან მოიტოვა.

“ჯერაც შოკირებული ვარ. ბელორუსი უმედლოდ არცერთ ოლიმპიადაზე არ დარჩენილა, ოქრო კი პირველად დავიმსახურეთ. არ ვიცი, ამ გამარჯვებას როგორ აღვნიშნავ, თუმცა, ის კი ცხადია, რომ დიდებულ დღესასწაულს მოვაწყობ”, - აღნიშნა ჩემპიონმა.

ამერიკელთათვის გაცილებით უკეთ წარიმართა შეჯიბრი სათხილამურო ორჭიდში, სადაც ოქრო-ვერცხლი ბილ დემონგმა და ჯონი სპილეინმა მიითვალეს. მე-3 ადგილზე ავსტრიის წარმომადგენელი ბერნარდ გრუბერი გავიდა.


ფრისტაილი. აკრობატიკა. კაცები
1. ალექსეი გრიშინი (ბელორუსი) 248.41
2. ჯერეტ პეტერსონი (აშშ) 247.21
3. ჟონგქინგ ლიუ (ჩინეთი) 242.53

სათხილამურო ორჭიდი. 10 კმ. კაცები
1. ბილ დემონგი (აშშ) 24:46.9
2. ჯონი სპილეინი (აშშ) +4.0
3. ბერნარდ გრუბერი (ავსტრია) +10.8


”მსოფლიო სპორტი”